隨住《星球大戰：原力覺醒》(《星戰7》) 即將上映，全球再次掀起Star Wars熱。動新聞專誠請嚟Star Wars 30年資歷fans、「全港最老白兵」唐上全先生同囝囝Edmund，連同一班《星戰》超級fans，分享佢哋同《星戰》之間嘅情結。
《星戰》譜父子情：
65歲嘅《星戰》迷唐先生表示：「人哋唔信我咁好魄力(扮白兵)！」囝囝Edmund補充，有次爸爸著住白兵鎧甲、戴住頭盔出活動，人哋都唔知佢年紀咁大，所以係咁被捕獲，4個鐘冇停過，連班後生仔都要休息，但爸爸仲係好雀躍。」唐先生話當初淨係同班後生《星戰》迷一齊影吓相，點知影影吓覺得佢哋好好玩，於是決定玩埋一份。Edmund憶述：「細個嗰陣爸爸會買啲Star Wars玩具畀我，所以某程度上，我都影響到爸爸認識Star Wars系列。」佢哋父子亦因此感情越嚟越好。Edmund：「我第一次同爸爸去睇《星球大戰》，大概1983年左右，最有印象就係整個熒光幕都係嗰架戰艦，畫面好震撼。」愛上《星戰》已經14年嘅Danny，都話最讚嘆係《Star Wars》嘅特技。
Marvel系列受《星戰》影響：
《星球大戰》的確影響咗好多人，包括Marvel Studios嘅President – Kevin Feige，佢曾經講過自己係Star Wars狂迷，仲問有邊個電影人唔迷Star Wars？所以Marvel系列(第二階段) 電影試圖向Star Wars入面嘅經典斷手情節致敬。《星戰》有一幕斷手情節好經典，就係天行者親自操劍斬阿爸(黑武士)隻手。粉絲Danny表示，如果我係佢，都會斬阿爸隻手，始終血濃於水，如果要令佢失去一樣嘢先會醒覺，咁樣嘅話冇辦法，惟有大義滅親。
《星戰》融入生活：
20年《星戰》迷 Kin揀女朋友嘅條件，要對方都鍾意《星戰》。3年《星戰》迷Tinyi話《星戰》對佢人生最影響嘅一件事，就係認識咗好多朋友，擴闊生活圈子。至於16年《星戰》迷Carmen則表示《星戰》已經變成佢生活嘅一部份。
到底點先可以算得上係《星戰》真狂迷？請留意下一集
鳴謝：The Rebel Legion Hong Kong Base