聖保羅男女中學噚日舉行100周年畢業典禮，邀請梁振英做主禮嘉賓，有唔少家長出席典禮，聖保羅附屬小學同中學嘅畢業生亦列席。有校友早前喺網上聯署反對邀請CY，學校校董會主席鄭慕智堅持過去都邀請時任港督同特首參加學校活動，故此CY照樣出席，噚日同太太唐青儀直入學校停車場先落車，校方就唔畀傳媒入內採訪。
八方喺校外見到前財政司司長梁錦松同太太伏明霞都有到場，小伏解釋，因為佢囡囡小六畢業；對於CY獲邀為主禮嘉賓？阿松笑住話：「特首嚟咪好囉！」前律政司司長黃仁龍都有到場，據悉佢都係該校學生嘅家長。雖則唔少學生同校友都唔想CY到場，但CY喺典禮上卻好風騷，同太太上台時仲親吻旁邊嘅女學生，並放相上facebook。但係嗰位被吻嘅女學生，就表現得有啲不情不願咁噃。