曼聯前鋒朗尼今季低迷，開季至今入得兩球咁大把，近期因傷缺陣，反而令紅魔鬼球迷更開心，因為唔使俾呢位「朗肥」阻住晒球隊進攻；點知朗尼唔單止場內，連場外都好鬼黑腳，繼上仗帶埋Kai仔入場睇曼聯，結果球隊就悶和韋斯咸0:0之後，周一再入場睇母會愛華頓嘅比賽，「拖肥糖」又僅逼和水晶宮1:1。
拖肥主場僅和水晶宮
或者朗肥都有自知之明，因傷缺陣球隊歐聯大軍名單，佢就冇堅持跟埋大軍作客德國鬥禾夫斯堡，決定留喺英格蘭專心養傷，星期一晚冇乜嘢做就帶埋大仔Kai返母會愛華頓，入到葛迪遜公園睇「拖肥糖」對水晶宮嘅比賽，點知愛華頓打唔出之前主場兩連勝兼入10球嘅威勢，更加被客軍後衞史葛丹恩76分鐘先開紀錄，好彩「新魔獸」盧卡古81分鐘入波追平，愛華頓先打和1:1。
近年不斷向母會示好
朗尼04年由愛華頓轉投曼聯，一度成為「拖肥糖」球迷眼中釘，不過近年成功洗底，又不斷向母會示好，都開始獲球迷接受，好似今年夏天愛華頓搞鄧肯費格遜紀念賽，朗尼都返去葛迪遜兼重披母會波衫，下年朗尼就加盟曼聯12年，紅魔鬼都準備下年八月幫佢搞紀念賽，朗肥仲屬意搵愛華頓做對手㖭。不過講真，朗尼𠵱家喺曼聯已經淪為負累，佢都要為自己前途着想，家陣𢭃緊30萬鎊（約348萬港元）周薪，合約仲要去到34歲，真係冇咩人想接手，就算朗尼真係「愛回家」想返愛華頓，睇怕都要減薪七、八成先有偈傾。
講起曼聯，領隊雲高爾嘅沉悶控球戰術就真係趕客，繼之前傳過拜仁慕尼黑教練哥迪奧拿明年轉任曼聯領隊後，就再傳「肥安」安察洛堤準備出山，仲話2017年雲高爾約滿後就接任，不過咁長遠就好難講。另外，曼聯中場舒韋恩史迪加上仗對韋斯咸向對手雲斯頓列特開踭，英足總已經準備秋後算賬，「小豬」隨時罰停賽三場。