勒邦占士（LeBron James）續約嘞！但騎士球迷唔好開心住，呢位四屆NBA MVP唔係同球隊續約，而係同「一剔」簽終身贊助合約；據報呢次係「一剔」44年歷史以嚟，首次向運動員提供終身合約，大帝亦力壓杜蘭特成為聯盟球鞋贊助費第一高嘅球星。
《ESPN》周一率先報道，占士同「一剔」續約嘅新聞，而克里夫蘭當地傳媒亦不斷流出合約內容，雖然未經官方證實，但相信新約個價唔嘢少。據報，大帝會接受終身合約，因為贊助費比杜蘭特今年初同「一剔」續約10年嘅三億美金，仲要高幾倍，甚至有指淨係呢份大約，已經多過占士歷來人工同代言收入，真係得人驚；估計贊助費每年會高達4,500萬美元（約3.5億港元）以上，一舉重登NBA球鞋贊助榜第一位（見附表）。
學MJ退役後繼續搵銀
咁講真，占士魅力就真係非凡，上年度佢自家系列嘅波鞋銷售額達到3.4億美元，係籃球界一哥，加上由2003年加入NBA開始，已經由「一剔」贊助，真係做生不如做熟啦。雖然佢已經30歲，球員生涯可能得番幾年，但「一剔」都肯畀終身約，應該想占士仿傚「波神」米高佐敦（Michael Jordan）咁，退休後將大帝系列持續推出，咁就長做長有啦。
講開又講，大帝今年同騎士只係續兩年約，下年仲係球員選項，有權自由身離隊。既然佢場外都搵咁多，不如學吓小馬前鋒奴域斯基（Dirk Nowitzki）、馬刺前鋒鄧肯（Tim Duncan）咁收順啲低薪續約，等騎士有更多子彈擴軍，爭取首奪總冠軍，咁就贏得更多尊重啦。
