全球數一數二嘅太平洋投資管理公司（PIMCO）有新搞作，PIMCO噚日宣佈新成立一個全球顧問委員會，委員會陣容粒粒皆星。
負責統領呢個委員會嘅，就係今年4月加入PIMCO做顧問嘅美國聯儲局前主席伯南克，其他成員包括英國前首相白高敦、歐洲央行前行長特里謝、新加坡政府投資公司GIC前投資總監黃國松。委員會主要負責喺環球經濟、政治同埋戰略發展上畀意見PIMCO。
雖然債王格羅斯舊年被逼走之後，PIMCO嘅基金表現仍然唔錯，但係有人覺得PIMCO少咗星級人物坐鎮，號召力始終差啲，今次新設呢個星級全球顧問委員會，唔知可否增添光芒呢？