與基金界朋友飯局，友人第一句就是「個市實冇運行喇」﹗臨近年尾，市況偏淡及交投疏落是常識，未至於大呼「冇運行」？友人解釋，看淡後市除了因港股無上升動力（盈利太依賴地產及內地經濟表現），是看到一個被稱為「星級分析員」的前基金經理近期頻頻曝光，幾近降格為「財演」，市況有多好，心知肚明。
友人說：「嗰個星級分析員，以前假假哋都喺大行做，好出名㗎，咁啱嗰陣個大市好景，佢講市都算準㗎，但唔知點解出咗嚟幾年，唔知係曝光太多，抑或同個市再無感應，啲預測唔準不得止，做吓做吓仲直情變咗財演㖭！聽講話，佢之前搞投資晚餐會，唔爆要搵人包底。」
英雄莫問出處，財演不用準確，準不準從來不是重點，言之成理兼能讓股民「哭股喪」才是財演核心價值，轉型為財演也很有前途，跟市況不好有甚麼關係？
友人冷笑聲，然後說：「若果好景，星級分析員仲唔嗱嗱臨重操故業，整返個基金炒股，就唔使拋個身做財演啦……當然，以佢現時水準，唔係咁易。」原來如此。
密西比