政界一直有傳金融服務界前立法會議員詹培忠有意明年立法會出山，仲要轉戰港島直選，金勞詹噚日同傳媒飯敍，坦言積極考慮緊，話計過3.5萬票就可穩佔一席，之後羅列10大強項，笑言每項都爭取到一定票數。咁有勝算仲考慮啲乜？佢話自己年紀唔細，就70歲喇，而且自覺冇乜後生仔票喎！
參選變世界大戰
到底金勞詹有幾強？有名你叫潮州怒漢，參選梗有「架己冷」支持，而佢話選舉時潮福一家親，福建票都吸唔少。佢深信亦有球迷票，皆因佢係香港足球代表隊名譽團長，而股票……應該係股民票先啱，佢又點會攞唔到？
最特別係佢話會有在囚及更生人士肯支持，皆因有政績可言：「（我）去赤柱休息時爭取咗一杯奶茶。」至於社團票，佢就話不解釋。而亞視觀眾票，佢都話攞到喎，因為主持咗90集《香江怒看》嘛！佢話做過立法會議員，市民知佢處事作風，自信點都有啲基本盤。最後兩強呢，就係選民對政黨厭倦，佢無黨無派有分加；加上會出動銀彈宣傳，搵年輕人幫手做網上攻勢，吸埋後生仔票喎。
金勞詹笑言，自己若然落場一定係亂局一場。咁又係，睇番港島形勢，民建聯曾鈺成唔選，若按傳言中部署，由Tree根、張國鈞分兩條隊出，未必箍晒上屆得票，加上工聯會擬派郭偉強代替轉戰超級議席嘅亡國興，新民黨葉劉淑儀選唔到特首又留喺度；加埋金勞詹，就係世界大戰咯。
李八方
mailto:[email protected]