【本報訊】大律師林作可謂今屆區選新人王，撇開十優港姐女友不談，接受傳媒訪問時的率性，娛樂性極高。林作受訪時大平反：「其實我係特登咁樣揀！」他說政治太沉悶，刻意走輕鬆路線，「輕佻少少、娛樂性少少唔緊要㗎，最緊要係你個理念有冇一個message出到嚟」，相信成功吸引部份年輕人關心他所倡議的中間路線式政治。
記者：許偉賢
選舉期間經常出現在娛樂版，林作直認有選民或持負面看法，「都唔知你嚟呢度（黃大仙龍星選區）做乜？」但認為此番「名氣」並非以三百多票敗於人民力量譚香文的主因，「最根本問題係時間唔夠」，稱欠缺足夠時間「瞓身」落區，「有啲其實唔鍾意我對手嘅選民，因為唔夠清楚我sell嘅嘢，而決定投畀對方」。
以賣理念而非地區事務為選舉策略，他也指值得檢討，「咁我未出嚟選過，又冇地區政績，要最快達到畀選民知道你賣啲乜，最快就係賣意念……但歸根究柢都係時間唔夠」。
不介意被指隱形建制派
麥明詩曾說男友不夠成熟，年僅25歲的林作坦承個人的選舉表現「進步空間好大」。記者舉例指他接受《壹錘定音》訪問時，予人輕浮之感，林作稱：「其實私底下我係比較嚴肅，嗰次嘅訪問style係我自己揀；啱唔啱係一件事，我當時覺得用咁嘅態度，可以抵銷一啲對我嘅攻擊。」
結果訪問最令人印象深刻的，是他回應是否知悉師傅清洪代表譚香文時前言不對後語，卻配上生鬼動作主動叫回帶，「當時我嘅助選團係咁喺隔籬做da-me（日文，意指不好）手勢；（我當時）精神狀態唔係好掂」。
「有啲人話我輕佻、輕浮、係好細個天真嘅表現；其實我係好樂意承認：我係專登咁揀！因為我相信𠵱家香港政治太沉悶，如果你喺一個訪問、寫篇嘢，成個feel好似政府高官咁講嘢，我自己作為咁樣年紀嘅年輕人，我都唔想聽。」
林作稱今次「輕佻少少、娛樂性少少」的論政風格已達標：「如果你冇（傳達理念），成件事係搞gag嘅，咁樣真係唔好；如果裏面有，結果令到更多人關注、去諗你嘅嘢，咁就係成功咗……有啲人同我講，今次因為你而follow咗區選好多，我覺得係一件好事。」反而他對被指隱形建制派不以為意，強調若然再揀也會以獨立招牌參選，「因為我係打緊一條第三路線：我真係希望中間溫和派，係可以成為一股勢力」。