美國11年來首次加息就快殺到，大家都預期加完息後美金會即刻飆上去，環球股市亦會因為加息嘅不確定性掃除而升返，不過花旗早排出咗份報告，話畀大家知呢啲睇法未必準確。
花旗統計MSCI股市加權美元指數（MSCI equity market-weighted dollar index）過往六次加息周期啟動後嘅表現，發覺指數於加息後四個月，五次下跌，一次上升。筆者試過用多啲人認識嘅美滙指數做統計，亦都得出相似結果。
花旗亦發現過去六次加息周期中，環球股市全數會喺加息半年前上升，有五次會喺加息三個月前上升。
奇怪嘅係，市場預期美國會喺本月嘅議息會議上宣佈啟動加息，但呢輪環球股市只係持平而非上升。加息未到，環球股市已經冇晒力，唔通關美國去年10月已經停止量寬事？
加息後又點呢？花旗話睇返以往六次加息周期，首次加息後三個月，股市得一次升，其餘五次都係跌。不過又唔使咁灰，因為加息唔係環球牛市殺手，隨住時間過去，環球股市加息後一段時間多數升返。花旗統計就指六次加息周期啟動後，有五次環球股市都會喺12個月後升返。
係就係會升返，但同加息前比較就升少咗好多。花旗指過往經驗顯示，加息後12個月，環球股市整體平均僅升9%，反觀加息前12個月，環球股市整體平均升幅有22%。
睇完堆統計，結論係加息後美元唔一定即升，股市亦唔一定即彈，尤其是今次加息周期唔同以前，因為儲局一早已經透過停止買債收緊幣策。
El.
本欄逢周二、四、五刊出