港交所（388）行政總裁李小加每次演講都好令人期待，事關佢每次都有精采金句或者比喻，噚日佢出席一個財經論壇，就用咗佢最鍾意嘅足球打比喻。
李小加老調重彈，指中國未完全開放，中國開放速度越快，香港機會就越大，因此，香港要早啲「卡位」，在場唔熟識足球用語嘅人，一時間聽到一頭霧水，好在李小加即刻補充，「我特別喜歡踢足球，踢得不好，但我知道卡位」。
李小加解釋，卡位就係球員一早判斷個波將會踢到去邊，預先卡喺嗰個無論進攻或防守都係最有利嘅位置，搶佔對手先機。講來講去，佢都係叫香港人把握人民幣國際化嘅機遇，例如內地希望透過大宗商品國際化，促使其他國家增持人民幣，香港就可以因應發展商品市場衍生產品。
李小加講嘅道理，大家都明，不過除咗卡位，入波應該先係最重要。