錦州銀行（416）招股嘅公開發售部份僅獲4%認購，噚日都可以順利掛牌，難怪董事長張偉心情相當激動，用濃濃嘅東北腔大呼：「我們的夢想實現了！」現場唔少內地賓客都齊聲歡呼。
錦州銀行受漢能集團巨額貸款影響，仲有東北經濟危機拖累，搞到散戶唔多吼，好在國際配售足額，咁先上到市。
唔知係咪興奮得滯，港交所（388）主持人約早上9點28分邀請張偉上台預備敲鑼，佢就一枝箭衝上去，手執敲鑼棒，急不及待「咚」一聲敲落去，當時都未到開市時間9點半，現場氣氛頓時變得尷尬。
不過大家嘻嘻哈哈又當冇事，張偉隨即又有番興致，要求全場人一齊倒數，佢又望實個鐘，再敲多次囉。