創新及科技局幾經波折終於成立，咁發展創新科技自然係現屆政府頭號大事，而被視為特首梁振英嘅支持者、前特首董建華牽頭成立嘅團結香港基金，噚日就搞咗個「創新創意創業」午餐會，仲搵咗全國政協副主席兼科技部長萬鋼（圖）就科技產業演講。
要滿足安全理由
萬鋼話香港係科學高地，創業重鎮，但高地都需要有平原令創新意念開花結果，所以內地正好係香港腹地，畀香港人才善用才華，又指內地會與創科局溝通。
不過講到要喺內地搞科技產業，資訊流通、互聯網又點會少得！不過萬鋼被問到內地互聯網幾時可以全面開放、包括facebook呢啲社交網絡平台，幾時可以係大陸自由睇到，萬鋼竟然話大陸嘅互聯網市場係一個競爭市場，又話大陸冇限制邊個，佢哋嘅互聯網市場係開放嘅！八方聽到呢到打個突，莫非北京已經拆咗防火長城？點知佢原來仲有兩句未講完，佢跟住話：「只要滿足我們的安全理由，都可以（進入大陸）」，咁即係一切冇變！