到底由幾時開始，香港的廣告代言人缺到咁？
打開電視，廣告時間不是上個世紀已經入屋的Do姐、袁詠儀、劉青雲伉儷，就係一眾前主播，彷彿電視新聞部才是藝人經理人部，捧紅一個又一個百搭男神小花，伍家謙拍的廣告，就由公用事業、零售、數到落投資機構都有，喂，到底是伍先生正到捨佢其誰，還是本地出現男神荒？
但如你問我，代言人還是一夫一妻勝過一夫多妻制，代言人拍的廣告越雜，代言越會失去意義，名人代言本來就是要找個背景性格氣質夾到天衣無縫的去代表該品牌，試問一個人又怎會多重氣質到如萬能key？
真正經典的代言人，你不會輕易忘記，數十年後的今天，人們還是難忘為Lancome代言的伊莎貝拉羅茜里尼和為Omega代言的仙蒂歌羅馥，而費達拿戴的是Rolex、佐治古尼飲的是Nespresso，媾女講的是what else，你都不會搞錯。
不過今天網絡之普及、鍵盤判官勢力之龐大，要搵代言人確實不易，而且更要加倍小心翼翼。從前只有電子傳媒和紙媒，傳媒又相對厚道，藝人名人縱稍有閃失，亦鮮有人把他們一腳踩死，永不超生。
但今天，你唔好彩搵着個負皮王拍廣告，或者你的代言人失驚無神講錯嘢，網民情緒一爆發，真係完全唔係人咁品，左一句卡已剪，右一句App已uninstalled，傳統媒體仲要驚你唔死，在紙媒又寫一轉，標題永遠是那句「公關災難」……
不過，也很難怪年輕藝人唔識死，得罪網民，有時就連企業要員都一樣口不擇言啦，事情明明已經解決，點解仲有人要出個明知會見光的電郵，沒甚麼政治污染？呢啲仲唔係公關災難！
彭瑪莉
mailto:[email protected]