鬧市搶槍咁大件事？八方講緊嘅係銅鑼灣時代廣場嘅樂高星球大戰展覽。話說地下露天廣場近排擺咗一班半個人咁高嘅LEGO版「白兵」畀人影相，本來每隻手都揸住一支槍好鬼整齊，點知噚日八方路過，居然見到其中一隻連手臂帶佩槍不翼而飛。陰功咯，實心痛死班fans！
時代廣場回應話，檢查晒之後發現只係得一隻白兵冇咗手臂，會將佢搬走維修，整番好就可以返嚟站崗。而官方facebook就貼咗張白兵同反抗軍嘅相，話返咗幾日工個人散晒，已經攞咗兩日假休息，但就冇講係乜人破壞。其實呢個展覽展期就去到1月1日，希望可以平安度過埋聖誕同除夕，八方都唔想有一日要喺淘寶執番佢哋啲手手腳腳。