俗稱「網絡23條」嘅《2014年版權（修訂）條例草案》，禮拜三就會喺立法會恢復二讀，隨即進行表決，特首梁振英仲再度開腔促盡快通過，講明拉布無補於事，班建制派又實幫政府護航，通過草案似乎勢在必行。不過，由於呢條惡法有多處地方含糊不清，仲涉及刑事，令網民擔心隨時瀨嘢，變相扼殺創作自由。就譬如改吓歌仔，玩吓電影橋段、改吓圖、串流打機片，或者SHARE呢啲二次創作作品，都分分鐘犯上版權刑事罪。最癲嘅係，刑事檢控權係由律政司決定嘅，就算版權持有人都未出聲。
如果呢條惡法真係通過，到時小鳳真忙就唔使旨意再唱呢首《慘過綿羊》啦。個個都變晒馴羊咯，仲唱乜鬼啫！