最近易帥由迪尼利接手執教嘅維羅納,喺周日意甲主場0:1不敵安玻里,開季踢咗15場聯賽仲未贏到。上屆意甲神射手之一、38歲嘅東尼可能都踢到冇癮,透露話踢埋今季就會退休。東尼喺上季意甲入咗22球,但到今季受傷患困擾,到𠵱家只係得一球進賬,佢話:「我退役之前嘅最大心願,就係幫維羅納成功護級。」東尼除咗兩度成為意甲神射手,亦喺06年贏過世盃,都算無憾。