勇士嘅當家球星「咖喱仔」史堤芬居里（Stephen Curry），喺禮拜日常規賽又發威，幫球隊以114:98擊敗網隊，開季22連勝之餘，仲將跨季連勝紀錄刷新至26場。不過，佢老婆就閉翳喇；因為愛爾莎（Ayesha Curry）喺twitter批評人哋着得太少布，點知就辣㷫晒班網民。
周二訪溜馬挑戰大
咖喱仔今場只係上陣32分鐘，但全場17投11中，包括五個三分波，咁就拎到全場最高嘅28分，似乎聯盟入面都冇乜人可以阻止佢得分。就連網隊主帥賀連斯（Lionel Hollins）都對咖喱仔嘅表現心服口服：「球隊要佢得分嗰陣，佢可以『40+』；其他時候，佢又可以幫隊友表現得更好。」勇士將會喺周二作客由保羅佐治（Paul George）領軍嘅溜馬（now635台明日8:00am直播），將會係佢哋跨季33連勝之路嘅最大挑戰；如果勇士順風順水，到聖誕大戰贏埋騎士，就可以追平1971/72球季湖人創下嘅33連勝紀錄喇。
同日，愛爾莎唔知係咪等睇老公比賽太得閒，竟然喺twitter話𠵱家啲人衣着暴露，仲話自己一定唔會着咁少布出街，因為好嘢梗係要留番畀愛人睇（見附表）。點知言論一出就即刻引起罵戰，唔少網民都覺得佢多管閒事，有網民話：「冇人會在意愛爾莎着乜囉，如果我想着迷你裙出街我都會照着，佢唔可以影響我嘅價值觀。」又有人覺得佢措辭不當：「愛爾莎想將自己由頭包到落腳係佢嘅事，但佢呢番說話，講到着得少布嘅人就好似不知廉恥咁。」
奧當老婆撐保持真我
有人反對，自然都有人贊成，當中仲不乏名人㖭。好似奧當（Lamar Odom）老婆Khloe Kardashian話：「愛爾莎，我愛你；你要繼續保持真我。」饒舌歌手Lil Duval仲話唔明班網民嬲乜：「愛爾莎都係嗌大家着番多件衫箒，唔通你哋想唔着衫出街咩。」