喺香港政壇，可以撈到建制派、民主派、官場三方公開兼私下取笑佢嘅，非教育局局長吳克儉莫屬。吳得掂話自己月讀30本書（含雜誌），睇書就如食早午晚三餐，搞到呢排政壇講起「睇書」，即時笑不攏嘴。難怪工業界林大輝（大師）喺質詢財政司司長曾俊華，都用睇書嚟寸吓曾俊華，曾俊華亦欣然接招。
林大輝喺噚日嘅財經事務委員會會議上，問鬍鬚曾嘅經濟簡報同上個公佈嘅季度經濟報告，充滿負能量，內容字眼充斥「不穩」、「憂慮」、「疲弱」、「難有起色」、「未許樂觀」、「表現欠佳」嘅字眼，批評鬍鬚曾只係毫無策略：「唔知司長係咪要學吓吳局長咁，睇多幾本財經書，學番幾招，睇夠50本一個月，畀啲新板斧我哋？」鬍鬚曾梗係知道林大輝唔係寸佢，而係抽吳得掂水，所以鬍鬚曾都順住個勢回應：「如果林議員有本好書介紹，我都好歡迎，搵時間去睇睇你介紹啲書。」
傳吳用咗過期雜誌名
八方近日又聽聞高教界流傳故事，話說係一個高教界宴會中，吳得掂做嘉賓致辭，其間引述一本佢睇過叫《幸福》嘅雜誌，然後發表偉論，出席者都頴晒頭，因為佢哋都未聽聞過時下有本雜誌叫《幸福》，點知再細聽有關內容，成班教授先發現，原來吳得掂講緊《Fortune》，中文譯做《財富》嘅雜誌。即使內地曾經叫呢本雜誌做《幸福》，但都已經係上世紀80年代嘅事。八方就梗係將呢個故事問下局長係咪真，佢透過新聞秘書話局長冇印象喎。
李八方
mailto:[email protected]