禮拜三(9日)快活谷騎師賽之夜如大混戰，9場比賽用A跑道，睇番上季騎師賽之夜，亦係用A欄作賽，當晚五場1200米或以下賽事，四場由守前三位入直路之馬匹勝出，可見短途宜秤先具前速之馬匹。不過中距離賽事後追馬劣勢稍減，好似「活力歡騰」及「新妙星」沿途俱留守中後叠位置，入直路反先對手勝出，所以靠追食糊嘅馬可秤先。
今戰列陣馬中，頭場「南華勇將」近三次跑谷草A欄一哩，獲冠季殿各一，亦係全場唯一贏過此移欄之參戰馬，匆出跑番強項可施回馬槍。另外，第三場「上浦猛將」上仗正是於谷草A欄贏馬，勝後等番同一移欄再跑，續配雷神可添食。