政府呢個星期唔知係咪風水差呢？班高官病完傷完一個又一個，早幾日律政司司長袁國強腸道不適入咗廠休養，民望高前日又跑步唔小心仆親，噚日八方見到CY，連佢都好似作病喎！話說佢中午出席「香港經濟峯會2016」嗰陣要講成20分鐘致辭，但係每講完幾句就咳一次，20幾分鐘演辭又咳又清喉嚨咁，要勞煩人幫手遞返杯水畀佢止吓咳，咦但係點解遞水畀佢呢啲咁操勞嘅工作，點解唔見咗你得力助手「白宮發言人」 新聞統籌專員（IC）馮煒光呢？
點知有攝記同八方講，話影到馮煒光疑似係外面睇女仔喎！咁八方一睇張相，又真係有個女仔行過，發言人望住人喎！咁八方就梗係問問白宮發言人！佢斬釘截鐵話冇睇女仔，張相影成咁係角度問題，佢完全冇印象！咁又係嘅，佢有個靚靚女友，點敢亂望？