剛剛大病初癒的男神王宗堯（Gregory），早前出席第三屆「鐘錶與奇蹟」亞洲高級鐘錶展，獲邀參與品牌名士錶BAUME & MERCIER的185周年慶祝活動。蜜運中的阿Greg現忙於拍拖，又自爆平時經常玩社交網絡，究竟男神每日如何運用24小時？
「時間運用真係好緊要，細個貪玩唔知時間嘅珍貴，《陀飛輪》呢首歌真係形容得好啱。錢冇咗可以搵得番，時間冇咗就冇咗。」原來王宗堯有型之餘都有點宅，男神坦言很喜歡沐浴在網絡世界：「24小時入面，我大概4至6個鐘頭用嚟作息瞓覺，3個鐘用喺社交網絡上面，因為上網好多資訊睇。」
王宗堯今次出席B & M慶祝活動，收到對方送上品牌最新Classima系列手錶，男神直言喜歡簡約錶款，並分享帶錶心得：「我鍾意簡約嘅，太浮誇唔係好襯自己。細個唔鍾意帶錶，覺得老套，大個咗就發現一定要成日keep住帶錶，係成熟男人嘅象徵。」阿Greg手上的Classima系列40毫米雙色自動腕錶（10216），配以黑色錶帶，錶面有品牌名字及日期顯示，簡約而型格，啱晒男神揀錶標準。
阿Greg更談到將來會生小朋友，莫非與女友Christy（黎紀君）好事近？「細個我Daddy送過一隻錶畀我，係佢讀書嘅時候儲錢買嘅，我相信有一個傳承嘅意義喺度。我將來會做番同樣嘅嘢，將自己一隻重要嘅錶，送畀我個仔。」
特約報道