區選除咗泛民同建制派之爭，其實建制派內部亦頻頻「開拖」，當中暗戰最激烈嘅非鄉事派同民建聯莫屬。花生友聽聞，有民記區議員今屆參選前，因為受到村民壓力、最終被迫退出民記後先至參選，據聞來屆元朗區議會主席之位，亦激起兩陣營惡鬥。
花生友聽聞，鄉事圈子流傳，有人不滿民記立法會議員、現任元朗區議會主席梁志祥，近日透過有勢力嘅好友、屏山鄉事委員會主席曾樹和出言「威嚇」區議員，又以太平紳士職位交換選票云云，仲決定就事件向廉政公署舉報喎。
花生友就上述嚴重指控向梁志祥查詢，梁志祥明確否認曾利用太平紳士職位交換區議員支持，話自己向來都會推薦有能力人士畀政府考慮；但最終係咪委任，由政府決定，自己根本冇可能用此作為選舉交易。梁志祥又話，曾樹和一直支持佢連任區會主席，但從冇威嚇區議員支持佢連任。
至於連任主席嘅信心？梁志祥表明係有嘅，𠵱家主要爭取緊游離票，自覺好適合出任主席：「因為我冇任何地區利益，冇乜嘢好申報，元朗好多涉及土地嘅嘢，如果由不涉及土地利益嘅人士做主席，會畀人感覺公正好多。」對於突然傳來連串負面消息，有民記消息反指，鄉事派計劃派出嘅挑戰者喺十八鄉囤積大量土地喎。花生友不知誰是誰非，只知泛民一定冇機。
花生友
周二、四刊出