中華全國青年聯合會兩位港區副主席，新世界發展第三代接班人鄭志剛同前全國政協委員施子清四公子施榮忻牽頭成立嘅「香港全國青聯委員協進會」噚日成立，副主席有鋼琴王子李雲迪，仲不斷俾人集郵。鄭志剛就話成立呢個會其中一個目標係團結青年，培養對國家民族認同喎。
噚日金融服務界立法會議員張華峰自爆有騙徒扮東海聯合（集團）有限公司主席黃楚標呃錢，仲話福建幫兩巨頭盧文端同林樹哲都有收到騙徒電話。八方問過盧文端囝囝盧金榮，佢話爸爸應該冇中招，因為前日食飯都唔見有提起，至於佢自己就好謹慎，有可疑嘅內地電話唔會聽，又會打番畀對方確認。至於黃楚標就係呢個會嘅顧問，但噚日無現身，只見恭賀花牌。