前晚嘅《東華》是非停不了，除咗何超儀被爆同家姐零交流外，杜麗莎喺「靚聲王」環節，據悉原本喺第四part，即緊接黎耀祥、胡定欣等推車環節出場，但杜麗莎喺後台突然拋下一句﹕「我未得呀！」搞到工作人員亂晒陣腳，要即場改rundown遷就。
第五part嘅胡渭康同韋綺姍被迫臨時頂上，胡渭康昨日喺電話度話﹕「我唔知呀，唔係差好多差一part啫。係PA突然話唔好意思，要調早咗一part，我本來part5變part4。」介唔介意？佢話﹕「唔會，我well prepare，隨時見得人。」
而張智霖同老婆袁詠儀前晚都好支持《東華》，成班坐喺屋企梳化等睇卡拉之星出場，等到凌晨近兩點仲留言﹕「然而我們還在痴痴的等......」但實情卡拉之星幾年己經停辦咗，前晚以「扮嘢王」取代。
經常喺卡拉之星環節表演手語嘅王維德都覺可惜，佢話﹕「冇咗兩三年，係冇咁燦爛，十幾年嚟一班同事，當玩又好做善事又好，令節目好熱鬧。依家又冇家燕姐參予(扮嘢王)，好似弱咗少少。」但東華最後都籌到逾一億善款，破晒紀錄！