社民連噚晚舉行成立9周年晚宴，喺旺角倫敦大酒樓筵開53圍慶生，今年重頭戲係文化監暴成員、歌手黃耀明唱歌，並由社民連馬雲祺負責彈結他。
嬲董建華攞嚟用
明哥獻唱甄妮嘅《奮鬥》，佢話知道董建華攞咗呢首歌嚟做佢嘅團結香港基金嘅廣告歌，所以要搶番首歌喎：「我好嬲，我要攞番呢首歌嘅話語權。」明哥一唱完，台下不斷叫encore；有人則即席叫學民女神周庭上台唱歌，但周庭好怕醜，話自己唔識唱喎。
文化監暴另一成員兼音樂創作人周博賢應承社民連，待明年社記創立10周年，送首黨歌畀佢哋賀一賀。
晚宴梗係唔少得拍賣「揼心口」環節，公民黨主席余若薇嘅「不在真話中崛起，就在沉默中滅亡」墨寶，以12,800蚊成交；漫畫家馬龍同尊子亦捐出作品，幫社記籌得幾萬蚊。