特區政府與香港鐵路（港鐵，股票編號66）達成協議，為高鐵建造價封頂，變相要求港鐵呢個Project Manager（項目經理）變成Project Owner（項目擁有人）咁款，承擔一切以後所有嘅超成本風險，但起好條高鐵之後，又要將項目交回番俾特區政府。港鐵作為項目經理，收特區政府管理費（49.4億，現上調至66.9億，增加咗17.5億），代政府監督、管理承建商興建工程，就算中間有疏忽，導致承建商有工程延誤，工程費超支，頂多只係被炒魷，政府沒收管理費嘅啫，點會被逼將工程攬晒上身，「包產到戶」㗎，以後如有甚麼天災人禍，導致建築費超出一千億元，港鐵就唔駛旨意賺錢咯喎。
呢個協議明顯係政治動作，特區政府作為大股東（佔75.74%），有足夠人馬坐在港鐵董事會，直情可以下令港鐵夾硬啃下苦藥，為運輸及房屋局脫身。原本預算係650億，今日估計超支194.2億，於是總費用封頂於844.2億，政府向高鐵工程費增撥196.2億，但港鐵同時要向所有股東派發特別股息257.6億，即每股4元4角，特區政府於是可得195.1億，換句話講，政府增撥款項，收回股息之後實際淨支出只係1.1億元，濕碎到極。
港鐵呢，本來有現金143.53億，根本唔夠派息之用，而且手頭上有咁多未完成工程，百零億現金未必夠用嘅啫，要派特別息喎，一定係向銀行貸款啦，最少要借二百億啩，適逢美國話要加息，港鐵無端端增加一筆利息支出，增加成本之外，負債比率上升至29%，假如因為美國加息而影響香港樓價跌，港鐵靠賣樓食飯，咪話唔頭痛。
何況仲有手尾跟。運房局局長張炳良在記者招待會上口口聲聲話政府與港鐵在工程管理及進度方面有分歧，日後可能有訴訟，仲裁等事情，而即將離任嘅港鐵主席錢果豐就猛話沒有法律基礎要港鐵負起工程責任，既然如此，港鐵點解要負起封頂之後嘅風險？即係大石責死蟹啦！文匯報（十二月一日）有幾張相片，張錢二人坐在一起，文匯報嘅照片說明係：「入座，交流，不聽，不理，離座」，好有弦外之音噃。左丁山不是港鐵股東，但見到有特別股息4.4元，而股價係36元，息率高達12.2%，真係心郁郁，但股票分析師T喝住：「股息分兩年派，首先要明年2月1日股東特別大會通過，港鐵以後孭上營運及政治風險。要諗清楚呀你。」