澳洲猛將柏寶殺得性起，第七場泥地四班1200米贏完蔡廐「劍飛聲」，第八場轉戰草地三班1000米，即以徐廐馬曾志偉老友區啟光愛駒「皇龍大將」再下一城，個人包辦第七口孖寶，兼帶挈徐雨石馬房連同第二場用黃皓楠勝出「天狼星」在內，這天成功起孖。
「皇龍大將」今場落重飛得手，以4倍次熱身份開齋，組合獨贏開A1只派15元，區啟光計埋早排「皇龍大師」連捷，季內已三次拉頭馬，旺氣逼人！
呢場第二名為重戴眼罩的容廐半冷馬「朋友仔」，此駒鞍上人巫斯義臨尾力策狂追，終點前與柏寶之「皇龍大將」一人一步，老巫、柏寶兩人終點前四目交投互睥，有你冇我，可惜「朋友仔」影相僅敗屈居亞軍；命運同第四場巫斯義騎「旅英公爵」搏輸做二奶一樣。
今場第三名由啡燈馬「勝利寶石」在蔣嘉琦胯下拎到，此駒放到拉士幾十米，「皇龍大將」、「朋友仔」追過，只輸頸位，明顯輸騎功，輸到落飛黨暈暈哋，第四名則由姍姍來遲的「忠心義氣」夥拍何澤堯後上取得，四重彩派一萬八千幾。