教育局政務官苦苦解釋TSA的原意，但吳克儉局長卻以私人理由到日本賞紅葉去也，紅葉會落，但吳局長只要夠左夠硬，仕途只有加分不會減分。在高層包庇下，才可目中無人。結果辛苦了李慧琼及她女兒了。
另一邊，知識產權署署長不斷公開為網絡23條豁免條款解畫，表示已對創作自由有足夠的保障，反觀負責的蘇局長，幾年來講來講去三幅被，毫無政治說服力可言，更遑論協助政務官面對政治爭議。再加上梁振英開腔希望立法會盡快通過法案，佢唔講由自可，一講就激起更多人反對，因為大家認定佢對言論自由、公民社會有敵意，不安好心。猶如鄭子誠現象，一出現搭上某議題，背後就一定有陰謀。
市民不信任政府
香港左的管治路線正在付出政治代價，日益寸步難行，民眾寸土必爭，因為左毒不得民心，破壞香港多年的遊戲規則：理性及共識，689成為施政困難的病灶，市民不信任政府，即使冇任何陰謀，大家心中有數，鄭子誠出場就一定有Hidden Agenda。
世上沒有無緣無故的愛，也沒有無緣無故的恨，689當年借僭建打殘唐英年奪取特首之位，跟手自己被揭僭建，即使用語言偽術蒙混過關，但今時今日，人人有發言權，點會咁易甩身。一邊話共建香港營，一邊分派公職畀梁粉，一邊話政改後專注民生，一邊使橫手搞嶺大、港大，仲癲到搵個失控大炮、同港大牙齒印極深之李國章入去整治。結果呢種對左毒的不滿體現在區選之上，一大班冇在區議會投票的泛民支持者走出來，令原本坐定粒六打殘泛民的大計，一手比689、李國章搞彎。
𠵱家形勢係即使政務官用政策理性說服泛民政黨議員，在689鬥爭為綱的政治環境下，條街人人喊打，邊個敢支持！在周六菜街公開論壇後，連長毛都被人包圍質問是否支持拉布。政府施政單靠建制派保駕護航，當然可以通過，但每次都要付出政治代價，而距離2016立會選舉日近，類似TSA、版權修訂條例呢種case，李慧琼、葉劉等人唔擋得幾多鋪。689一味以為同泛民鬥，完全錯晒，𠵱家係素人之亂、公民抬頭。泛民都俾素人夾，政府別無選擇，只有直接面對民意，提高決策透明度，強化政策論述能力，少擺無謂政治姿態，最重要係改變鬥爭思維。
梁粉政權根本冇辦法及冇能力做到，務虛不務實，以為只要扮晒習近平條強人路線就可取悅中央，對本地民意不屑一顧，一條蛋散吳克儉，都可以寸到視反對意見如無物。成棚人邊個有能力面對民意？幾年來一味用旁門左道，吹風放料，做鍵盤戰士寫網誌，記者會掂行掂過，議政水平超低。689仲慌死星期三唔夠人包圍議會，寸嘴話拉布冇用，創科局咪又俾我搞掂。
政務官對住一班「低B又左又勇武」政客，仲有邊個會有心機做事！
添馬男