隔牆有耳：
元秋化身魚蛋妹救廟街 - 李八方

油麻地廟街販商商會噚日晚上舉行美食救市之夜，展示多款美食車吸引遊客同市民。廟街有位歌神尹光好出名，但噚晚肯定唔夠民建聯立法會議員蔣麗芸吸睛，皆因元秋唔單止到場支持，仲化身魚蛋妹，上車即場炮製魚蛋同雞蛋仔等，冧到唔少食客送上真金白銀支持。

「好想食，但唔好意思」

由千金小姐變為魚蛋妹，做起嚟有冇難度先？元秋話幾好吖，自爆難度最高嘅，反而係要忍住口唔准拮嚟食，笑笑口話：「我好想食，但係唔好意思！」佢話邊一行都辛苦㗎嘞，最緊要自己鍾意份工囉。財爺去年財政預算案中建議推美食車，商會主席陳錦榮認為可以「袋住先」，但覺得始終不及街頭攤檔，因為街頭攤檔可以「炒幾味」，而美食車非一般小商販能買得起，擔心俾集團壟斷。