Jimmy Choo（周仰傑）設計嘅鞋，好多女士都趨之若鶩，華華近日行經九龍香格里拉，發現酒店大堂擺放住Jimmy Choo幾幅高跟鞋手稿，細問之下，先至知道唔係展覽，而係舉行緊一項聖誕慈善活動。
九龍香格里拉最近搵來周仰傑合作，舉辦籌款活動，大家捐出50元就會獲得一張高跟鞋嘅草圖卡紙，然後可以盡情發揮創意與藝術天份，明天（8日）之前將草圖紙交番畀酒店，之後由周仰傑選出最搶眼嘅設計，得獎者可以獨家獲得周仰傑親筆簽名嘅自家製迷你鞋履。
所得善款全數撥捐「愛心聖誕大行動」，支持本地22間為兒童、長者、智障或殘障人士服務嘅機構。
現場所見，唔少參賽作品嘅水準非常高，聞說周仰傑本月有機會抽時間來港親自頒獎，到時唔止見鞋，仲見到真人㖭。