人越大，越愛懷念那些年。39歲嘅民建聯陳克勤近日喺facebook貼咗張92至93年嘅少年時代照；當年16、17歲嘅佢，同當時嘅男生一樣，跟風剪咗個四六分郭富城髮型；事隔廿幾年，郭富城變咗國貨城，當年今日一樣chok；陳克勤則由學生哥，升呢做埋民建聯副主席噃，佢喺facebook留言：「那些年，我對鏡頭已經好有觸覺。」
無啦啦做乜貼相話當年？陳克勤話喎，佢嘅母校漢華中學最近搞緊校慶活動，有好心人搵舊資料時搵到呢張相後傳畀佢，咪share出嚟開心吓。其實相入面企中間嗰位四眼哥哥，同陳克勤一樣係民記要員，認唔出係邊個？咪就係民建聯秘書長陳學鋒囉。