雷神停賽餓馬餓足三個賽日，這天復出唔係人咁品，頭三場先擸冠亞季各一，火速領先騎師王。到了第四場四班草地1200米，呢位巴西勁人夥拍蘇廐「魅力知心」12檔起步，均速前置跑主動，就此由頭帶到尾，雷神除咗幫自己連同頭場贏「精算博奕」起孖之外，亦為「魅力知心」大熱開齋，兼且用頭馬氹番女馬主鄧詠琪開心。
鄧詠琪剛周三晚尾場，見到自己同鄭是鳳的聯名馬「情投意合」跑跛腳被人道毀滅，忍唔住淚灑快活谷，四日後隨即在沙田贏馬補數，今季首次拉頭馬嘅佢，可謂悲喜交集。「魅力知心」上仗配潘頓初出即近，呢次再攻田草1200米，潘頓去日本跑冠軍盃，焗住換上雷神，順利以2.6倍大熱身份開齋，組合獨贏開A1派17.5元，這天56歲生日之蘇保羅，連續第二次日賽有馬贏，其父蘇禮雲亦來港與他慶祝。
今場四重彩由全場最高分、最重磅兼最細冧巴四駒玩晒，低分馬統統隱形，其中4號「魅力知心」勝出，1號「旅英公爵」後上入Q，3號「開心遊戲」第三，2號「大行情」則跑第四，四重彩派5,114元。