滙豐銀行今年8至9月搞咗個「全城優質服務選」，由客戶投票，選出嘅「最優質服務分行」就係滙豐旺角分行，銀行冇詳列原因，不過，旺角分行素有「木人巷」之稱，可能對員工與服務嘅要求再高些少啩。
滙豐旺角分行位於亞皆老街與彌敦道交界，銀行界流傳，呢間係滙豐在港最猛料嘅分行，皆因唔少紅褲仔出身嘅高層，都曾經在此擔任分行經理，好似滙豐銀行前大班艾爾敦就是其中一例，所以獲選為「最優質服務分行」，都算係毫無懸念。
至於「最方便客戶銀行服務」 ，就係「簡易交易櫃位」，此櫃位只辦理3宗以內嘅指定交易，65歲以上與殘障人士客戶都可以排呢條隊，有助分流，替客戶慳番啲排隊時間。
滙豐較早前又安排咗一個提升專業形象嘅工作坊，為員工嘅談吐、儀容、步姿做特訓，下次落分行理財要留意一下先。