讓八旬獨居婆婆寄存後備鎖匙；借錢給老街坊，為兒女交書簿費應急；散賣$2.5一支香煙，給煙癮大卻又無錢的老街坊，還有讓周日放假「秘撈」賣汽水餅乾的外傭賺一百幾十寄錢返家鄉……每個屋邨，總有一個街坊驛站，在瀝源邨，它是豐昌辦館。1975年開業，與老邨一起成長，小店今年也剛好40周年。
「以前閣樓有個倉，畀兩個夥計住，做得夜，索性喺度瞓，一落樓即可以開舖」。豐昌由爸爸及四叔創辦，那些年的孩子，放了學輪流看舖，要不就幫忙「抹麻雀」，「以前冇乜娛樂，放假攻打四方城，一副麻雀好貴，唔捨得買，好多人租，五蚊一日，仲送上門」。
物換星移，麻雀再無人租；超市、便利店進駐，生意不如前，夥計早沒了，唯一不變的，是那份獨有的人情味。「你問事頭婆啱㗎嘞，佢對老人家最細心，人人都嚟呢度吹水，有街坊話冇錢幫個仔交書簿費，佢連錢都借畀人，你話好唔好人先？」路過的街坊蒲太說。
生意不如前 不變是人情
事實上，豐昌門口，總放着一張凳。絡繹不絕的師奶兵團，晨完運無所事事的婆婆，剛送完女兒返學的年輕師奶，街坊驛站瞬間轉移，成為吹水站。呂少珠說：「試過住喺第7座嘅婆婆，80幾歲，抹鐵閘拍埋咗道門，個仔電話又唔記得，咪借衫借錢畀佢，等佢坐的士去上水搵個仔，𠵱家佢索性放串鎖匙喺度，唔使再擔心冇門口入」。忘了帶銀包，買了東西未付錢，收銀櫃旁的賒數單就派用場。「做街坊生意，大家講個『信』字」。她說得理所當然。
呂少珠有四兄弟姐妹，舊時代的長女，總特別顧家，原本與丈夫在街市經營海鮮檔的她，3年前接手家族生意，自此，朝六晚九，一星期返足七日，兩口子沒再放過一日假，「請唔起工人，惟有自己做，爸爸退休時已經88，老人家好傳統，間舖用阿爺個名，唔想執，咪幫手囉，佢同阿叔創業，我哋係守業，梗唔想做衰個名。不過呢行真係好困身，一日到黑收貨拆箱冇時停，啲米同鹽又要分開一小包，方便婆仔買少少都得，好在我先生退休肯幫手，唔係得我一個點搞得掂？」
家住大圍，每天5時起床，準6點開舖，「好多地盤工人出元朗開工，開工前，過嚟買對勞工手套買包煙，然後坐頭班車出去；阿公阿婆唔使講，好早起身，要買油鹽雜貨；下午學生放學，買零食汽水……」兒時回憶，總有這一幕：放學後和同學流連街坊辦館，手上一支冰涼汽水，眼望着晾衫夾夾着包裝薯片，心中盤算袋中的零錢夠不夠。
人情味到底敵不過歷史巨輪。瀝源邨原本的5間辦館，只剩兩間，生意不好，加上下一代不願接手，名副其實執一間少一間，「叫做搵到兩餐，多就一定冇，仔女係好孝順，但我都唔指望佢哋會接手，做埋我哋呢代，真係可以收工……不過近呢幾年，真係多咗後生仔女幫襯我哋呢啲老古董，啲貴價煙絲，都係佢哋介紹我哋賣，仲帶埋啲客人過嚟，怕我哋冇生意。」呂少珠說。