星期五晚行先達，個個sales都「鞋晒」口臉，生意難做是也！
好多舖都話冇乜點發市！往年12月都仲係iPhone炒賣季節，而且一般都會延續到農曆新年前；不過今時唔同往日，iPhone 6s及6s Plus基本推出首兩月，一早已經跌破「招股價」，所以如今市場吹緊無定向風！意即冇甚麼產品能主導市場，所以就算在聖誕檔這個消費意欲旺盛的季節，都一樣冇手機特別好賣。
在舖頭一遍吹淡風下，「唔交租」呢個每年必玩上一次的老問題，又在先達場內吹起大風！所謂的「唔交租」，就是在淡季或生意難做情況下，先達一些生意唔好的舖頭，就會唔交租兩個月；而當租舖時交下的「兩個月按金」燃燒殆盡之時，生意轉好就補交，生意繼續唔好的，就關門大吉！不過以往這種「唔交租」情況，多發生在農曆新年後的淡季，不過今年就特別一些，竟發生在12月的買禮物旺季！
其實呢個情況，亦好切合早前《爆料王》所講，農曆新年後先達可能會有結業潮，由今日計起的兩個月，就差不多是農曆新年前夕！雖然我都唔想有類似情況發生，不過在追問一些場內「大拆」時，他們都表示好些細舖，在流動資金上都開始有點緊絀的問題，而且場內拆機情況，都有好顯著的下跌情況，據不願透露姓名的資深手機店老闆表示，最壞情況有可能是五至六成舖，會在農曆新年前、後關門大吉！
何解他們會如此關心？其實這是一個好簡單的分餅仔遊戲，舖多客少情況下，生意當然唔夠做，但當手機舖銳減一半，留下來的手機店，就可望生意收入達致平衡；現在先達已經到了一個汰弱留強的戰國時代，誰能留守到最後一刻，看着別人關門大吉，他們就有機會翻生了。
文：星爺