潘頓赴日本策騎「準備就緒」出戰冠軍盃，加上多位騎師繼續停賽，曾經坐冷板嘅湛明諾同貝諾華，支持度上升，兩人周日(6日)同樣有9匹座騎，捱過一段苦日子後，終於漸入佳境。
小湛喺剛周三開齋，騎「飛快叻」爆冷捧盃，最後200米跌鞭齋推之下，仍然K.O.潘頓隻1.5倍大熱「紀利福星」，呢位22歲小將，曾勇奪法國打吡，終於喺香港顯示出功架。當晚之前，佢嘅法國經理人兼翻譯Herve返回法國，小湛英文又唔得，喺香港嘅前景一度令人擔心。好在，有位法國同鄉女郎夠晒義氣，近幾次賽事幫手為小湛擔任翻譯，就係容廄巨胸女騎馬人Xaviere。
唔少馬迷都記得Xaviere一手教好「電子鳳凰」，原來佢獲得鵬哥批准後，近幾戰喺小湛身邊跟出跟入，估唔到冇耐小湛就贏「飛快叻」，證明Xaviere腳頭好。
小湛早前接連有馬唔出閘或空馬起步，Xaviere話小湛知道自己因此做咗馬迷笑柄，一度好唔開心，家陣反彈梗要食住個勢出番啖氣。今期小湛座騎中，「飛馬看花」上仗在港初出直路賽，狀態未足兼2檔欠佳，前段都走得唔錯，熱身之後近日再試閘力谷，騎落有反應後上取勝，今次出王牌再戰直路賽，小湛同告達理分分鐘繼「飛快叻」後，再合作建功。