劉青雲是系列電影的常客，計有《竊聽風雲》、《絕世好Bra》和《暗戰》等系列出品，最新就有《消失》系列，繼2012年的《消失的子彈》後，今次輪到《消失的兇手》出場，鮮有演反派的青雲繼續正氣演出，同片還有游走忠奸之間的林家棟。家棟認為，忠與奸的界定，很見仁見智，黑白分明只在以前的電影。引伸到今日的政治生態，何嘗不是「何為邪鬼何為神，神鬼如何兩不分」的世界。
撰文：譚倩宜
劉青雲跟林家棟合演新片《消失的兇手》，戲中青雲再次扮演神探，跟家棟鬥智鬥力。近年青雲所接拍的角色多屬正派，對此他笑謂：「真係唔知點解，搵親我嘅都係做好人，對上一次叫衰人嘅角色，應該係《竊聽風雲3》，不過其實自己冇特別要求做正派定反派，只要劇本好就得。」
反觀林家棟近年飾演的大多扮演歹角，今次他在《兇手》中飾演一個為了個人利益而利用學生的教授，但他卻不認為角色是十惡不赦的大壞蛋，並指每個人都總有陰暗面：「以前年代嘅電影黑白分明啲，但當你長大咗，睇番每件事其實都係觀點與角度問題，每個人做每件事，都一定有佢嘅理由去支持自己嘅行為，所以我唔會將個角色定為奸人。佢係自私，利用人嘅弱點，反而覺得個角色仲人性啲，因為每個人都有自私嘅一面，唔知喺咩情況下會勾到出嚟。」
忽略身邊事
家棟又指自己在工作上也有自私的一面：「我最自私就係喺工作上對自己嘅要求，好聽嘅叫做忽略其他人，唔好聽嘅叫『我都費事理你』。」他又稱不少人曾經對他說，人在成長後，需要照顧多方面情感，但他直言自己在工作時，往往會忽略此事：「我成日都會忽略呢啲嘢，又或者係唔畀自己去理，因為顧及太多，有啲事就做唔到，如果你話我咁係自私嘅，我唔反對亦唔否認，不過金錢上我就冇咩所謂。」
內在藏魔筋
為了探討人性，家棟甚至會購入歷史書以作研究，問到他可會覺得了解越深，越發覺人性醜惡？他笑說：「每個人都有呢個種子，只係睇乜嘢事、啱唔啱timing，同引唔引到條魔筋出嚟。」家棟坦言「魔筋」的形成，都是源自於利益的衝突：「以前自己會好執着，會唔識體諒人，但𠵱家已經學識放開同諒解，一啲𠵱家好堅持嘅事，若干年後睇番，其實只係好小事，何必逼到自己魔性走出嚟，偏執又解決唔到件事。」他認為見證到，也是一個成長。
而青雲則指自己較愛看推理小說，特別是日本作家寫的推理書：「以前會睇好多日本推理小說，我會覺得書好睇過電影，因為要將一本書濃縮成一套電影，往往會拍唔晒。」他指自己在推理方面亦相當了得。問到青雲歷年來最愛的一齣推理電影？他說一定非《七宗罪》莫屬：「無論拍攝定演繹都好好，但我睇完之後好唔開心，因為戲內畢彼特個老婆被殺，呢吓真係覺得導演去得好盡，但亦因為咁先好睇，成套戲揀角揀得好啱。」
做事少後悔
青雲於戲內曾揚言自己從不後悔，問到現實中的他能否做到？他說：「我係比較少嘅，但有冇做錯過呢？梗係有啦！人梗係會做錯或講錯一啲嘢，可能有時係對人冇禮貌，又或者做錯一啲選擇。」他又以選擇行車路線為例，指可能偶爾會選擇了一條塞車的路線：「你揀咗條塞車嘅路真係想死，但你冇諗過另一條路都有機會塞車，揀咗另一個結果可能仲唔好呢，所以我唔會比較，如果有唔好嘅咪改，又或者盡快忘記佢。」
《兇手》中不少劇情值得思考，如家棟於大學授課時提及「公義」一詞，指公義就是少數服從多數，問家棟可認同電影內對公義的處理？他說：「我認同，多於一把聲音公義就存在，只係睇大家點去處理，好似𠵱家咁，其實大家都係質疑個處理手法，而冇話公義係消失咗，只係點處理先可以顧及到大家都渴望得到嘅答案，顧及邊一邊利益受眾多啲。」
場地提供：E-Max
劉青雲
化妝：Puipui FC
髮型：Jun Ho of Suave
林家棟
服裝：Club Monaco
化妝及髮型：Jessica Yuen of Oasis Studio
