近日碰到長實地產執行董事趙國雄，問佢樓價會唔會大跌，佢答得爽快：「唔會嘅，有調整，冇大跌，最近CCL中原城市領先指數下滑，引起關注，其實由年頭到十月，以我所見，樓價係咁升，有10%左右，依家係有調整，自高位回落，估計返番年初水平啦，最基本因素係香港人對住宅需求殷切，土地供應時有阻滯，總之房屋問題一年兩年之間難以解決。」
樓神趙最近主打元朗「世宙」新盤，話賣得好好，其實長地今年賣樓目標（約250億）已達，但攞到批准賣樓花就一定唔會留着樓盤唔賣，本着貨如輪轉宗旨，一批即推，故此今年賣樓一定超標，樓神趙話賣樓最緊要唔好離地，訂價貼近市場就冇衰。依家好多人買將軍澳盤、元朗盤、他日買洪水橋盤，皆因港島九龍缺乏新樓供應，每有市區樓出售，呎價郁吓就兩三萬元一呎，真係好蝦人，好似啟德「煥然壹居」咁，鬧出風波，工聯會民建聯民主黨與公民黨四位議員竟然會聯手一齊反對市建局准許月入六萬元嘅單身人士申請，就足以證明房屋問題最得議員關心，議員如果諗過冇政治分數可拿，鬼會咁肉緊咩。
歸根究底係市區房屋供應不足，逼市民搬移向昔日郊區，住在灣仔中上環就係富裕象徵。市區若然土地不足，可唔可以學紐約咁，興建多啲七八十層高嘅住宅大厦呢？不過一講出嚟，就會俾環保團體鬧。
大名鼎鼎嘅經濟學家克魯明原來已經遷居紐約市，佢嘅紐約時報專欄在12月1日講紐約冇得頂，文娛設施多，治安之好，如脫胎換骨，市民感到十分安全，星級餐廳數唔晒，文化節目多籮籮，住在紐約市認真過癮。不過，並非人人住得起，冇番咁上下收入，唔該住在郊區。克魯明分析點解美國高級行政人員唔似阿爸嗰代咁樣住市郊（Suburban）？主要理由係現在行政人員工作時間長，唔會六點咁早放工趕去搭火車回家，大家做得夜，就想留在市中心吃飯跟住行路返屋企。負擔得起住市區嘅全是高職位，高技能，高薪人士，於是高級餐廳文化節目就大有市場，一齊興旺，唯一覺得唔好嘅就係收入不太多之人，因為佢地付不起高昂市區租金，被逼遷離市區，克魯明一睇就明白，市區房屋供應嚴重不足，再去搵原因，就係「土地用途」有太多法律規條限制，不能善用盡用，克魯明係一個大自由派，到咗紐約住就居然同意保守派嘅見解，證明房屋問題的確可以統一思想！