行過黃金，循例上下兩層兜個圈，但今次多咗個目標，想話睇吓有冇啲合家歡式嘅game玩吓。
「老細，有冇啲幾個人一齊玩嘅game呢？」
「大把啦，乜game都online一齊玩啦𠵱家！」
「唔係咁，我意思係屋企幾個一齊玩！」
「有呀，呢隻打到飛起，嗰隻就嚇到你飛起，仲有隻爆粗爆到飛起，好high㗎！」
「啊，但冇乜理由同阿女打機學粗口㗎，有冇啲益智啲㗎老細？」
「益智？唔興㗎喎𠵱家。」
唔興？諗唔明，一路行去排隊食豬潤麵，一路諗起幾年前打Wii嘅溫馨畫面，一人一碌控制器在手，男又玩女又玩老又玩細又玩，好似Mario賽車咁，堪稱係史上唯一女仔可以玩贏男仔嘅賽車game，而一系列運動game就更係將打機變成有益身心嘅盲點大突破；死毒男搖身一變成為運動型男，功德無量。係唔知點解Wii會慢慢式微咗，搞到打機又變番毒男嘅地下活動，只適合喺冇人同夜深進行嘅活動，冇乜社會地位！
所以，當上周某日去朋友辦公室嗰時，然後發現佢位女同事竟然識玩FIFA，仲要係主動開機，兼揀定多蒙特等你挑機，呢一刻，佢係迷人嘅！喺無波不歡嘅麻甩世界入面，如果女友種類係有排名嘅話，一個肯陪你睇波嘅女友係難得，但最多只係排第二位，遠遠不及嗰位肯同你打機嘅地位，因為FIFA女友並唔係「陪」你做啲你鍾意做嘅嘢，打FIFA係無得「陪」打嘅，鍾意就鍾意，唔鍾意就想打人！而且大家都會明白一個「陪」字後面，係另一個「賠」字，要還㗎！
講番場友誼波，FIFA啲掣其實係複雜過「乜嘢係越位」10倍嘅問題，但女同事冇嫌煩，一路打一路好細心咁聽扮勁嘅男同事教路點撳點撳，完全滿足晒男人天生鍾意扮權威嘅慾望，女同事仲要輸波都一啲都唔嬲嬲豬，滿心歡喜準備下一場！
你話嘞，想生活好定係想脫毒好，係咪都應該搵位FIFA女當係寶吖。
文：KEYMAN