紙媒越嚟越難做，TOM集團咁大間上巿公司，旗下茶杯雜誌出版有限公司噚日被報道指結業，人稱大班嘅創辦人鄭經翰都話好可惜之際，出版社顧問總編輯陶傑噚晚突然喺佢fb話，明年1月1日起接手以網絡經營。真係瞬息萬變，八方即call陶傑問佢，點解買起Cup經營。佢話，今次以象徵式用1蚊買起Cup，改名為《星Cup日刊》網上經營。
陶傑指網媒發達，資訊已經唔值錢，首創透過網絡刊載佢對國際政經事件見解，「朝早會發表一次，下午再補充；另外有其他副刊；咁樣經營網媒，以前未有過，讀者係要睇我嘅見解。」陶傑又話，會裁減三分二人手，留低三分一人經營網站，「有需要再慢慢加人。」