公民黨噚日同青年新政就新東補選問題開會，據知公民黨派出男神鄭達鴻赴會，但青政女神游蕙禎冇現身，而梁頌恆（圖）就到咗。雖然雙方會上商討氣氛良好，公民黨仲帶蛋糕請對方一齊食，但據知雙方仍對係咪搞初選冇結論。
八方聽聞，青政提出喺新東搞8至10個投票站，預計要用成廿萬，公民黨對此有保留，覺得要喺新東搵咁多票站唔容易，涉及資源亦唔只廿萬咁少，更難以短時間搵到咁多義工幫手。加上公民黨向來都跟足規距辦事，最快都要20號先可以召開會員大會，正式通過參選人選。明年1月5日就要報名，所以覺得搞初選實在太趕。雙方雖未傾得掂，但同意繼續WhatsApp溝通，公民黨會再作黨內溝通，再同泛民傾，先決定下一步。