世界盃外圍賽中港大戰打完咁耐，有乜爭拗都應告一段落，點知原來餘波未了。中大校長沈祖堯日前寫網誌，批評中大同學喺直播中港大戰當晚噓國歌嘅行為，仲引用錢穆先生「你是中國人」一語訓示，但隨即俾新亞學生會「將軍」，質疑沈校長冇搞清楚錢穆所說嘅「中國」，好似唔係中華人民共和國喎！
「你是中國人，不要忘記了中國」
話說沈祖堯喺佢篇《尊嚴和尊重》網誌中，提及11月17日中港大戰當晚，中大學生喺校園籌辦觀賽活動，當球場播國歌之際，有觀賽同學即報以噓聲，沈校長話呢種侮辱國歌行為，極為不當，令佢非常心痛，仲引用中大前身新亞書院創辦人、國學大師錢穆先生，當年喺寓所素書樓講最後一課時畀學生最後贈言：「你是中國人，不要忘記了中國！」提醒唔好有違先賢訓勉。
不過噚日新亞學生會出招還擊，寫咗封公開信畀校長，話對校長引用錢穆嗰句話感大惑不解，因為「錢穆先生之所以南下香港，創立新亞，是因為逃避中共的魔爪」，當年「中華人民共和國開國領袖毛澤東」亦喺《丟掉幻想準備鬥爭》一文中，點名批鬥錢穆。
而錢穆辭去新亞書院校長後，就到台灣中華民國定居，佢當年講課嘅素書樓就喺台北，學生會反問沈校長，究竟錢穆先生所指「中國」，係邊個「中國」？仲話錢穆喺新亞人嘅心中地位崇高，希望沈校長引用先賢說話要正視歷史，不宜引喻失義。
李八方
mailto:[email protected]