【我主場】Youtuber司徒夾帶：
單靠拍片生活唔到

除非含住金鎖匙出世，否則為生活必須努力工作，Youtuber司徒夾帶、伍公子、Miss Hunny和Ronnie等，為爭曝光走入公仔箱參加無綫真人騷《網絡挑機》，出發點是賺人氣，4人日前接受本報專訪，大呻做Youtuber表面風光，他們雖受網民熱捧吸到點擊，但笑聲背後暗藏血淚史，司徒夾帶自爆曾拖欠員工薪酬，銀行戶口試過不過百元。
撰文：比華利

近年無綫劇集太膠，相對無邊無際的網絡，年輕一輩的娛樂就選擇熄機上網睇YouTube，司徒夾帶更是熱爆的Youtuber，一般的Youtuber都是個體戶，自己顧自己，但司徒夾帶就擁有旗下製作公司，全組有7人，製作室座落土瓜灣工廠大廈內。司徒夾帶坦言營運製作團隊不易，才深入無綫「虎穴」求變，他參加拍攝真人騷《網絡挑機》，企圖利用無綫慣性收視增加知名度，借名吸利。
司徒夾帶表示公司維皮不易，他說：「員工開支，燈油火蠟，一個月點都要10幾萬，呢行前景又唔好，單靠拍片分賬係生活唔到。」司徒夾帶更形容公司財政狀況如亞視，他不諱言：「我有拖過員工糧，唯一唔同葉家寶嘅係我冇犯法，有時我唔出畀自己，先出畀員工。」司徒夾帶最辛酸曾試過銀行戶口不足100元：「係撳唔到錢出嚟，直至𠵱家，公司都未叫上軌道，好彩我兼營網絡藝人公司，藝人有job帶嚟收入。」該公司收納了11位網絡藝人，Miss Hunny更是愛將之一。
司徒夾帶答應參加《網絡挑機》，目的是透過大氣電波賺人氣，他說：「佢利用我同時，我都利用番佢。」他期望升呢成吸金演員：「我哋呢次上TVB，出嚟反應好大，希望借住呢條罅攝上去。」下一步要帶領旗下網絡藝人衝出重圍嗎？他說：「我示範吓先，希望網絡藝人可以喺媒體上恒常出現，可惜香港冇選擇，只可上TVB，我希望呢鋪衝得上。」

嫌無綫刻薄

借無綫作踏腳石，司徒夾帶卻說：「都係博吓，可能上到，但負評都可以扯番你落嚟，節目未完等於未埋單。我年紀大，負擔大，冇得揀，只有博一博。」是否想博入無綫做親生仔？他耍手擰頭：「唔啦，佢哋咁刻薄，咁多人離巢，如果我簽就真係抵俾人鬧。」

【伍公子：我係網絡窮人】

伍公子、Miss Hunny和Ronnie都有份參加無綫真人騷《網絡挑機》，三位Youtuber是否挑機成功，見仁見智，他們求上位出發點卻是一致，畢竟Youtuber有別於明星，兩者吸金能力差天共地。
伍公子在高峯期所拍的短片，每條的點擊輕易過10萬，他說：「當時我每日出一條片，一個月點擊加埋就有300萬，YouTube分紅每月有兩萬，但呢嚿錢都唔夠養活家人，真係考警察好過。我邊係『網絡紅人』，我係『網絡窮人』。」近年伍公子近乎零產量，為生活只得轉型，他希望藉名氣代言廣告：「我嘅新目標係搞個成功online project。」伍公子強調不會再上電視，他說：「除非睇錢，除非我好窮。」
至於Miss Hunny，近日也跳出YouTube框框，開始寫劇本，希望將作品搬上大銀幕，Ronnie則朝做導演目標努力。