現年50歲的郭富城（城城）日前在微博貼相高調認愛，揸車拖住比他年輕23歲的「新城嫂」方媛（Moka），並留言：「這樣開車要慢一點。」全城抽水抽到乾，人人爭住上載拖手、拖腳相放上網，連深圳交警都表示要着手調查。
獲女友讚演技
不過城城此刻眼裏只有Moka，昨日5時許忽然在微博再「放閃」，貼出與女友合照相，邊飲湯邊自拍的城城留言：「這樣吃飯要慢一點……嗎@MK_fy。」Moka鬼馬回應男友：「別皮了！快吃飯。」從城城的黑超鏡反映，見到枱上有四碟食物，明顯是撐枱腳，真是隔住副「超」都感受到甜蜜！
城城昨晚在旺角為《踏血尋梅》謝票，一臉風騷的他食住爆谷做訪問，記者笑他慢慢食。問到女友有否睇其新片？他笑言：「梗睇咗，梗有讚。」再問他昨日貼與女友撐枱腳相，女友是否在港？他表示：「私人嘢唔使講。」電影有長短版，記者問他女友睇哪個版本？他說：「唔使刻意講我女友對我睇法，工作還工作，生活還生活。」
不過，「新城嫂」不斷被人起底，有指她曾在廣州夜店工作、報細年齡，又影過性感寫真集；不少網友覺得城城今次高調認愛態度好反常，九成留言都是負評。有人問城城是否微博被盜、有人問他是否中「愛情降」，甚至估計二人下次會發床照等。
採訪：嵐山、譚倩宜
