「Hello，大家好，又我『桃花心』呀，我唔算好有名氣，但我嘅實力好強，我曾經排14檔之下打敗『喜蓮巨星』，我同『喜蓮巨星』平時冇乜兩句，我只知佢個主人吳婉芳好靚，同埋亦知『喜蓮巨星』後來贏咗遮打盃，做咗最佳長途馬。
我亦都好爭氣，喺去年香港瓶面對世界級強敵都跑到季軍，攞到過百萬獎金，阿頭蔡約翰仲猛讚我Good Boy！今年我已經六歲，喺馬匹嚟講變咗中坑，但上月我跑馬會盃，狀態未十足都輸唔遠，自問唔係太差，點知賽後馬會竟然唔畀我參加新一屆香港瓶，簡直係晴天霹靂，成個down晒。好在世事如棋，不久有外隊馬退出，我忽然又獲補入跑香港瓶。
阿頭知道呢個消息後，問我有冇信心，我老虎都話有啦，不過我自問仍未喺最Fit水準，於是呢日特登去試閘，谷一谷狀態，我知要贏香港瓶，就要付出更大努力，於是喺試閘中起勢考驗自己，估唔到我以長途馬身份，喺短途閘擊敗高班短途馬『英勇大師』，跑第三綽號大陽神嘅『首飾太陽』，試完都猛讚我勁，話我有Heart喎！經過呢課閘，我敢講必能以100%水準迎接香港瓶！」