民主黨涂謹申（圖）喺黨內有朵叫「民主黨FBI」，前排佢又有奇遇﹗
阿涂話前幾晚10點幾左右，陪同一位受恐嚇滋擾嘅苦主去差館報案，當時有其他人喺報案室報案，一個係速遞騙案，另一係同裸聊有關。
有位認得阿涂嘅警員見佢入嚟，就問佢係咪報案，跟住問案件性質，阿涂未嚟得切開口話恐嚇，警員就問係咪裸聊喎，係嘅話就入房傾﹗阿涂即同警員講：嚴重好多呀﹗
阿涂當然知道呢位阿Sir同佢講笑，身為「民主黨FBI」嘅佢就同八方分析，阿Sir咁問其實反映咗一樣嘢，就係近期真係涉及唔少速遞或裸聊騙案。唔知阿涂係咪又要準備出動、展開調查呢？