由於巴西處於嚴重經濟危機，里約熱內盧奧運成本超支，賽會發言人周四就話，為咗削減開支，下年嘅參賽運動員喺選手村開冷氣都要自己畀錢。如果里奧舉行期間，巴西真係熱到成攝氏36度，唔少選手都擔心會因而影響表現。
拎咗女子馬拉松參加資格嘅港將姚潔貞話：「如果當地真係好熱，房內冇冷氣一定有影響，因為會消耗更多體力；希望當局會提供風扇畀選手，同埋冇蚊飛入房啦。我諗賽前兩、三日，我會就去適應氣溫。」香港奧委會副會長劉掌珠都話，高溫會影響運動員嘅睡眠質素。
陳晞文：心靜自然涼
至於好大機會代表香港參戰嘅滑浪風帆選手陳晞文就比較樂觀，話冇冷氣對佢唔算好大影響：「呢兩年我都試過兩次喺八月去里約，其實當地天氣都算涼，同埋只要環境乾淨啲、少啲蚊嘅話，房內冇冷氣都冇問題。其實運動員自我調適能力高，心靜自然涼。」