湖人球星拜恩（Kobe Bryant）宣佈退役後，唔少人覺得佢今季唔可以再贏總冠軍係一種遺憾。好彩，據美國傳媒《TMZ》周四報道，Kobe好大機會代表美國出戰里約熱內盧奧運，以金牌去為職業生涯作結，都叫完美吖。
美國男籃發言人基格米拿（Craig Miller）接受《TMZ》訪問嗰陣話，拜恩仲喺34人大軍名單度，所以有望出戰里奧：「拜恩唔需要再做咩去證明自己夠料入選。球隊唔係由12個實力最強嘅球員組成，我哋會揀啲可以令球隊變得更好嘅球員。」最終大軍名單由籃總主席哥里哲奴（Jerry Colangelo）同「K教練」科錫維斯基（Mike Krzyzewski）決定；後者一直都好欣賞37歲嘅Kobe。
雖然里奧發言人喺周四話為咗削減開支，選手村會冇冷氣，但呢件事應該對美國男籃冇影響，因為佢哋好大機會好似之前幾屆奧運咁，自費租住五星級酒店；之前雅典奧運嗰陣，佢哋更加係租郵輪住㖭。
湖人點衰都唔炒史葛
講番拜恩隊波湖人，𠵱家只得3勝15負喺西岸墊底，但球隊就力撐教練史葛（Byron Scott），話冇諗住炒佢。據《今日美國》指，湖人戰績差係因為Kobe季後退役，就算佢狀態有幾咁飄忽，史葛都唔會阻止佢上陣喎。
