有「網絡23條」之稱的「2014版權（修訂）條例草案」，將於下周恢復二讀，網民普遍認為若條例通過，會嚴重影響二次創作空間，限制創作自由。昨日導演黃修平在facebook分享了一條名為「哪一天我們會釘」的短片，明顯是他的新作《哪一天我們會飛》跟舊作《狂舞派》的混合版。他借此表明不介意二次創作，並留言：「堅決反對網絡23條！」
改歌詞或要負刑責
黃修平昨日接受電話訪問時，明確表明反對立法，他說：「其實好多網民同法律組織，提議過一啲豁免，但都畀政府否決，現行嘅條例對網絡嘅自由好有威脅，打壓咗好多自由，所以好明確係反對（通過）。」他認為在沒有豁免之下，改歌詞有可能負上刑責：「唔係我決定告唔告，係政府決定，我覺得之後（政府）係一定會形成一啲政治打壓。」
一向敢言的黃秋生昨日接受訪問時，曲線反對通過網絡23條：「梗係贊成，不過點都要研究十年八年，要請埋專家返嚟，商討再商討，要堵塞所有漏洞，唔可以太草率決定。」經常是惡搞對象的林峯，表示不應限制創作想像空間：「香港有價值之處係有新聞自由、網絡自由可以天馬行空，唔可以阻止一個行業創作空間。」盧海鵬則說：「最多咪唔改囉！可以有另一方面創作，撳啲人死，但人係生嘅，唔會撳死，除非冇觀眾聽。咁有冇24條呀？冇就得啦！」
Twins昨晚出席活動，蔡卓妍（阿Sa）說：「如果真係要立法要清楚列明條例邊啲為之犯法，如果唔係會有灰色地帶，可能有時會冇心之失犯法。」王宗堯反對立法說：「通過梗係有影響，喺fb轉載、貼圖同模仿語氣都犯法，最好唔立法。」
採訪：楊定、李森、王連連