港專馬鞍山本科校園噚日開幕，邀請署任行政長官林鄭月娥同中聯辦主任張曉明做主禮嘉賓，本應開開心心，但港專嚴陣以待，封校唔畀學生返學，仲困住記者喺密室，搞到眾行家嬲爆。
採訪通知寫明11時嘅採訪，搞到12時先開始，呢啲事時有發生，但行家想參觀新校舍，港專公關大為緊張，度度唔畀去，要喺指定位置罰企。
典禮後校長陳卓禧忙住招呼賓客，公關要記者去密室等，唔可以周圍走，好似怕咗記者接觸學生。原本校長被安排1點半見傳媒，但等極唔見人，行家忍唔住問：「校長唔守時點教學生？」公關竟話：「唔知校長去咗邊，搵唔到佢」。催了又等，等了又催，校長終於到。其實大家都係想了解新校舍箒，唔通有乜國家機密唔畀得人知？